Хөдөө аж ахуйн их сургуулийн Хэрэглээний шинжлэх ухааны сургуульд “Инженер технологийн дээд боловсрол” төслийн хүрээнд Байгалийн ухааны багц лабораторийн нээлтийг тохиолдуулан “Хэрэглээний шинжлэх ухаан” онол практикийн бага хурлыг 2026 оны 02 дугаар сарын 13-ны өдөр зохион байгуулав.

Хурлын эхэнд ХШУС-ийн захирал И.Баярбат “Байгалийн ухааны багц лабораторийн хүчин чадал, сургалтын үйл ажиллагаа явуулах чадамжийн тухайд” илтгэл танилцуулж лабораторийн хүчин чадал, сургалтын үйл ажиллагааг чанартай зохион байгуулах асуудалд онцгой анхаарах шаардлагатайг тэмдэглэв.

Хурлаар онол, практик хосолсон өргөн хүрээний

• Монголын бэлчээрийн систем дэх хонины метан ялгаруулалтын факторыг IPCC TIER 2 түвшний аргачлалаар тооцсон судалгааны үр дүн,
• Ni-Ti-Hf-La хайлшийн микробүтэц, фазын хувирал болон механик шинж чанарын судалгаа,
• Машин сургалтыг ашиглан дроноор авсан зургаас адуу илрүүлж, таних судалгааны үр дүн,
• Улаанбаатар хотын агаарын тоосонцор дахь олон цагирагт ароматик нүүрсустөрөгчийн агууламж, эрсдэлийн үнэлгээ,
• Монгол Улсад орчин цагийн хөдөө аж ахуйн мэргэжилтэн бэлтгэж эхэлсэн түүхэн цаг үеийн судалгаа,
• Монголын хил дамнасан дотоодын жуулчдын фэйсбүүк хэрэглээнд тулгуурлан технологи хүлээн авах загвар (TAM)-аар хийсэн шинжилгээ зэрэг илтгэлүүдийг хэлэлцүүлэв.

       Хуралд оролцогчид судалгааны арга зүй, үр дүнгийн ач холбогдол, практикт нэвтрүүлэх боломжийн талаар идэвхтэй хэлэлцүүлэг өрнүүлж, харилцан туршлага солилцлоо.