Экологийн YIII олимпиад болов 

Нийслэлийн ЕБС-ийн 12-р ангийн сурагчдын дунд ХААИС-ийн Экологийн тэнхимээс уламжлал болгон зохион байгуулдаг Экологийн YIII олимпиад 5 дугаар сарын 22-нд Агроэкологийн сургууль дээр боллоо.

                 Ирээдүй хойч үедээ экологийн боловсрол олгох, байгалийн нөөцийг зөв зохистой ашиглах, хамгаалах, нөхөн сэргээх үзэл төлөвшүүлэх, мэргэжлийн чиг баримжаа олгох зорилготой тус олимпиадад 12 сургуулийн 23 сурагч бүтээлээ ирүүлж өрсөлдсөн юм.

                 YIII олимпиадын гэрийн даалгавар нь“Уур амьсгалын өөрчлөлтөөс биологийн төрөл зүйлд үзүүлж буй нөлөө” сэдэвтэй реферат бэлтгэх байв. Энэхүү сэдвийн хүрээнд уур амьсгал өөрчлөгдөх шалтгаан, үр дагавар, хүлэмжийн хийг нэмэгдүүлэхгүй байхад жирийн иргэд хэрхэн хувь нэмрээ оруулж болох вэ гэсэн асуудлаар өөр өөрийн оюун ухаанаа уралдуулж, фото зураг, хүүхэлдэйн кино,  ТV мэдээнүүдийг цуглуулан баримтжуулж ирүүлсэн юм. 

                 Нийлбэр дүнгээр 81-р сургуулийн сурагч Б.Жавзанпагма I байр, 23-р сургуулийн сурагч Төмөржин, 18-р сургуулийн сурагч Х.Нарангэрэл нар II байр, 58-р сургуулийн сурагч Ө.Хулан, Л.Чанцалноров, 33-р сургуулийн сурагч Ч.Болормаа нар III байрыг тус тус эзлэв.

                 Олимпиадад оролцогчдод ХААИС-ийн Сургалтын бодлого зохицуулалтын албанаас Экологи, байгаль хамгаалал, Байгаль орчныг хамгаалах технологи хөтөлбөрөөр элсэн суралцах урилга гардууллаа.

Экологийн тэнхмийн дэд профессор Ш.Оюунтуяа