ХБНГУ-ын SpringerOpen байгуулагын төлөөлөгчид зочлов

Эрдэм шинжилгээний ном, сэтгүүлийг нийт судлаачдын хүртээл болгох чиглэлээр үйл ажиллагаа эрхэлдэг ХБНГУ-ын SpringerOpen байгууллагын Хятад, Солонгос, Монголыг хариуцсан газрын дэд ерөнхийлөгч, хатагтай Young Cui болон тус байгууллагын мэргэжилтнүүд ХААИС-ийн удирдлагатай өчигдөр /2015.09.23/ уулзлаа.Эрдэмтэн, судлаачид судалгааны бүтээлийн үр дүнгээ орон зай, цаг хугацаанаас үл хамааран дэлхий нийтийн хүртээл болгох, өөрийн судалгааны чиглэлээрх хамгийн сүүлийн үеийн ололттой танилцах боломжийг дээрх байгууллага олгодог юм.

Дэлхийн 26 оронд салбартай, ижил төстэй үйл ажиллагаа эрхэлдэг байгууллагуудаас хоёрт эрэмблэгддэг. Жилд дунджаар долоон мянга орчим ном, зургаан зуу гаруй эрдэм шинжилгээний сэтгүүл шинээр өлгийдөн авч сан хөмрөгөө баяжуулдаг байна.  Уулзалтын үеэр хоёр тал хэд хэдэн чиглэлээр хамтран ажиллах санал солилцлоо.

Тухайлбал, ХААИС-иас эрхлэн гаргадаг Шинжлэх ухаан сэтгүүлийг олон улсын түвшинд хүргэх гарц, ХАА-н чиглэлийн багцыг худалдан авах боломж, хэрэглээний талаар санал солилцлоо. Тухайн байгууллагын хэрэглэгч болохын тулд гэрээ байгуулан эрдэм шинжилгээний бүтээлүүдээс он оноор болон салбараар нь сонголт хийх боломжтой. Гэрээ байгуулахын өмнөх туршилтийн хугацаанд сонирхсон багцаа 2 сар үнэгүй хэрэглэхээс гадна 400 гаруй сэтгүүлийн мэдээллийг төлбөргүй уншиж болох аж.

Илүү дэлгэрэнгүй мэдээллийг www.springeropen.com хаягаас уншаарай.