Биотехнологийн улсын III олимпиад болж байна

ХААИС-ийн Мал аж ахуй, биотехнологийн сургуулиас /МААБС/ зохион байгуулж буй Биотехнологийн улсын III олимпиад өнөөдөр /2016.03.30/ болж байна. Тус олимпиадад биотехнологийн чиглэлээр мэргэжилтэн бэлтгэдэг ХААИС, МУИС, ШУТИС, MIU, Шинэ Монгол технологийн дээд сургуулийн 140 гаруй оюутан оролцож буй юм. Олимпиад ганцаарчилсан болон багийн төрлөөр явагдах бөгөөд оюутнууд МААБТС-ийн судалгааны лабораториудтай танилцана.

Нээлтийн үеэр МААБТС-ийн захирал О.Баатарцогт хэлэхдээ  “Та бүхэн Монгол улсын ирээдүйн мэргэжилтнүүд. Энэ олимпиадад оролцсоноор зөвхөн өөрийгөө сорих биш мэдлэгээ хуваалцах, хамтран суралцах, ямар түвшинд байгаа мэдэх зэрэг олон боломжийг олж авна гэдэгт итгэж байна” гэв. Олимпиадын нэгдсэн дүн 15 цагт гарна.