“Мэргэжлээ зөв  сонгоё” танилцах аялал болов

ХААИС-ийн Сургалтын бодлого зохицуулалтын алба, Инженер технологийн сургуулийн Механик инженерийн тэнхим, Монголын сурагчдын холбоотой хамтран  “Мэргэжлээ зөв  сонгоё” сэдэвт танилцах аялалыг /2016.04.22/ зохион байгуулав. ЕБС-ийн төгсөх ангийн сурагчдад ирээдүйн мэргэжлээ зөв сонгоход нь туслах зорилгоор ХААИС-тай танилцах тойрон аялалыг үргэлжлүүлэн зохион байгуулах юм.  

Танилцах аялалын үеэр сурагчид Инженер технологийн сургуулийн Металл судлал, технологийн мэргэжил сурталчлах өдөрлөгт оролцов. Тус тэнхимийн 1-4 дүгээр ангийн оюутнуудын  бүтээл, хөтөлбөрт зориулан туурвисан багш нарын ном товхимол, гарын авлага бүтээлийн үзэсгэлэнг дэлгэсэн байв. Мөн Профессор Л. Чулуунбат, доктор Ө.Ганбат, доктор М.Довчинванчиг нар элсэлт, мэргэжил сонголт, металл судлал хөтөлбөрийн талаар танилцуулга хийж, оюутнууд урлагийн тоглолт үзүүллээ.

Сурагчид энэ үеэр “Бид өөрийнхөө болон эх орныхоо хөгжилд үнэтэй хувь нэмэр оруулах мэргэжлийг сонгохыг хүсч байна. ХАА-н салбар бол Монгол улсын эдийн засгийг тогтвортой хөгжүүлэх тулгуур салбар гэдгийг ойлгож байгаа” хэмээн ярьж байлаа.