ХААИС-ийн Захиргааны жижүүр Ц.Догмидмааг ХХААХҮЯ-ны “Жуух бичиг”-ээр шагнав

ХААИС-ийн Захиргааны жижүүр Ц.Догмидмааг ХХААХҮЯ-ны “Жуух бичиг”-ээр шагнасаныг Нийгэм эдийн засаг эрхэлсэн дэд захирал Ж.Батчулуун гардуулан өглөө.

Ц.Догмидмаа нь 1961 онд Өвөрхангай аймгийн Хайрхан дулаан суманд төрсөн. Сумынхаа 8 жилийн сургуулийг 1978 онд дүүргэн, 1978-1980 онд хуучнаар ЗХУ-ын барилгын ТМС-ийг мужаан мэргэжлээр төгсөж Өвөрхангай аймгийн Барилга угсралтын конторт мужаанаар ажлын гараагаа эхэлсэн. Оройгоор 9,10 дугаар ангиа төгсөн, 1980-1984 онд ахлах түрүүч цолтойгоор цэргийн алба хаажээ.

1987-1993 онд ХААИС-ийг Мал зүйч мэргэжлээр төгсөн, 1993-1997 онд Төв аймгийн Лүн суманд Мал аж ахуйн үржлийн албаны улсын байцаагч, 1997-1999 онд Төв аймгийн Баянхангай сумын Засаг даргын Нийтлэг үйлчилгээний албаны дарга, 1999-2000 онд МААЭШХ-нд мужаан, 2000-2004 онд Амгалан өрх өрхийн эмнэлэгт жижүүр, 2004 оноос одоог хүртэл ХААИС-ийн Захиргааны жижүүрээр ажиллаж буй юм.