Хөвсгөл аймгийн Арбулаг сумын 10 жилийн сургуулийн багш, сурагчдын төлөөлөл өнөөдөр /2020-11-09/ ХААИС-тай танилцлаа. ХААИС-ийн анхны захирал, доктор, профессор Цэвэгжавын Жамъянжав тус сумаас төрөн гарсан нийгмийн зүтгэлтэн бөгөөд энэ жил мэндэлснийх нь 100 жилийн ой тохиож буй юм. Тиймээс багш, сурагчид ХААИС гэх эрдмийн их өргөөний анхны галыг асааж, өнөөгийн хөгжлийн замд түүчээлэн 26 жил энэ сургуулийг удирдсан их хүмүүний ажил, амьдралын замнал болон сургуулийн үйл ажиллагаатай танилцан нэг өдрийг өнгөрүүллээ.

Багш, сурагчдыг Агроэкологийн сургуулийн захирал А.Буянбаатар, МААБС-ийн захирал О.Баатарцогт, ЭЗБС-ийн захирал Б.Баасансүх нар хүлээн авч уулзан бүрэлдэхүүн сургуулийнхаа талаар мэдээлэл өгч, Хөдөө аж ахуйн салбар нь дэлхий нийтийн хүн төрөлхтний амьдрахуйн чухал асуудлыг шийддэг цогц шинжлэх ухааныг агуулсан салбар гэдгийг онцлон танилцууллаа.  Мөн тус аймгийн харьяат, Агроэкологийн сургуулийн багш, доктор Д.Дэлгэржаргал мэргэжлээ зөв сонгох нь их амжилтын үндэс гээд АНУ-д тэтгэлэгээр суралцсан түүхээ ярьж, сурагчдын сонирхсон асуултад хариуллаа.  

Ийнхүү Хөвсгөл аймгийн Арбулаг сумын сурлага, урлаг, спортоор тэргүүлсэн 21 сурагчийг ХААИС-тай танилцах гүүр нь болж ажилласан Агроэкологийн сургуулийн багш Ж.Эрдэнэчандманьд багш, сурагчдийн төлөөлөл талархаж буйгаа илэрхийллээ.