Тус албанаас санаачлан ХААИС-ийн захиралтай байгуулсан үр дүнгийн гэрээний хавсралтаар батлагдсан 2022 онд хэрэгжүүлэх үйл ажиллагааны төлөвлөгөөнд тусгагдсан ажлын хэрэгжилтийг хангах, харьяа эрдэм шинжилгээний хүрээлэн, бүрэлдэхүүний сургуулийн үйл ажиллагааны уялдааг шинэ шатанд гаргах, салбарын эрдэм шинжилгээний сэтгүүлийг хөгжүүлэх, шилдэг өгүүлэл нийтлүүлсэн профессор багш нарыг дэмжих зэрэг асуудлаар санал солилцох уулзалтыг 2022 оны 02 дугаар 25-ны өдөр амжилттай зохион байгууллаа. 

Уг уулзалтад Эрдэм шинжилгээ, инновацын албаны дарга, ажилтан нар, бүрэлдэхүүний сургууль, харьяа хүрээлэнгийн Эрдэмтэн нарийн бичгийн дарга нар, ХАА-н эдийн засаг, инновацын хөгжлийн төвийн захирал, ажилтан нар оролцов. Мөн уулзалтад Монголын Номын сангуудын консорциумын удирдах зөвлөлийн дарга Л.Гантулга оролцож, эрдэм шинжилгээний сэтгүүлийг хөгжүүлэх, сэтгүүлийн редакцын зөвлөлийн гишүүд, судлаачдыг чадваржуулах чиглэлээр санал солилцож, цаашид эдгээр асуудлаар хамтран ажиллахаар тохиролцов.

Уулзалтын эхэнд Эрдэм шинжилгээ, инновацын албанаас 2022 онд хэрэгжүүлэх үйл ажиллагааны үндсэн чиглэлүүд, тэдгээрийг амжилттай хэрэгжүүлэхэд харьяа хүрээлэнгийн судлаачид, бүрэлдэхүүний сургуулийн профессор багш нарын оролцоо, үүрэг, тэдгээрийн бүтээлч хамтын ажиллагаа чухал болохыг онцлов. Үүнтэй холбоотойгоор ХАА-н эдийн засаг, инновацын хөгжлийн төвийн ойрын үед хэрэгжүүлэх үйл ажиллагааны талаар тус төвийн захирал, академич А.Бакей товч танилцуулга хийсэн бөгөөд судлаачдын судалгааны үр дүнг үйлдвэрлэлд нэвтрүүлэх, хэрэглээ болгох чиглэлээр онцгой ач холбогдол өгч хамтран ажиллахыг уулзалтад оролцогсдоос хүсэв.
Мөн уулзалтын үеэр ХААИС-ийн захирлын 2021 оны 09 дүгээр сарын 22-ны өдрийн А/143 тоот тушаалын нэгдүгээр хавсралтаар батлагдсан “ХААИС-ийн шилдэг өгүүллийн зохиогчийг урамшуулах журам”-ын хүрээнд олон улсын Web of Science, Scopus мэдээллийн санд бүртгэлтэй эрдэм шинжилгээний сэтгүүлд ХААИС-ийн нэр дээр нэгдүгээр болон холбоо баригч зохиогчоор эрдэм шинжилгээний өгүүлэл хэвлүүлсэн багш, ажилтныг шалгаруулах ажлыг амжилттай зохион байгууллаа. 

Web of Science, Scopus мэдээллийн санг ашиглан шалгаруулалтын журамд заасан шалгуур үзүүлэлт /үндсэн багцад бүртгэлтэй Q: 1-4 эрэмбэд хамаарах/-ээр шүүлт хийж дүнг нэгтгэхэд: 
Нэр бүхий 7 өгүүллийн 9 зохиогчийг /нэгдүгээр зохиогчоор 1. Б.Батбилэг АЭС, 2. А.Гоомарал МААБС, 3. З.Ундрах ЭЗБС, 4. Б.Буянтунгалаг ЭЗБС, 5. Б.Сандагдорж, МЭС, 6. Ж.Амгаланзул ИТС, Холбоо баригч зохиогчоор Д.Баатархүү ИТС, Б.Баярмаа ЭШИАлба/ шалгаруулж журамд заасны дагуу 400.000-1.000.000 төгрөгөөр урамшуулахаар тогтов. 

Мөн журмын 4.6-д заасны дагуу хамгийн өндөр үзүүлэлттэй сэтгүүлд өгүүлэл хэвлүүлсэн АЭС-ийн багш Б.Батбилэг “Шилдэг өгүүллийн зохиогч”-оор шалгарсан байна. Тэрээр Geocarto International (Q1 эрэмбэ, IF 4.889, CiteScore 6.7) сэтгүүлд “Applicability of different vegetation indices for pasture biomass estimation in the north-central region of Mongolia” нэртэй өгүүллийг нэгдүгээр зохиогчоор хэвлүүлсэн байна.

ХААИС-ийн профессор багш, судлаачдын хувьд Research4life.org; https://link.springer.com/ зэрэг олон улсын шинжлэх ухааны томоохон мэдээллийн санг ашиглах боломжтой байдгийг судлаачдад хүргэхийг сануулав.        

Тус уулзалтын үеэр “Хөдөө аж ахуйн салбарын эрдэм шинжилгээний сэтгүүл хөгжүүлэх хөтөлбөр”-ийн хүрээнд сэтгүүлийн үйл ажиллагааг хариуцсан нэгдсэн зөвлөл болон ХААИС-ийн химийн бодис ашиглах зөвшөөрөл авах ажлын хэсгийг тус тус Эрдэм шинжилгээ, инновацын албаны дэргэд байгуулахаар тогтов. 

ЭРДЭМ ШИНЖИЛГЭЭ, ИННОВАЦЫН АЛБА