БНСУ-ын буцалтгүй тусламжаар ХААИС-ийн Мал эмнэлгийн сургуулийн дэргэд Мал амьтны эрүүл мэндийн төв байгуулагдаж, шинэ оны эхнээс туршилтын журмаар ашиглалтад ороход бэлэн боллоо. БНСУ-ын Хөдөөгийн Хөгжлийн Корпораци(KRC) болон Хүнс хөдөө аж ахуйн яам(MAFRA)-ны буцалтгүй тусламжаар “Монгол Улсын мал эмнэлгийн чадавхыг бэхжүүлэх, мал амьтны эрүүл мэндийн төв байгуулах” зорилготой энэхүү төсөл нь Монголын талаас ХХААХҮЯ, Сангийн Яам болон ХААИС, БНСУ-ын талаас Хөдөөгийн Хөгжлийн Корпорац(KRC) болон Хүнс хөдөө аж ахуйн яам(MAFRA) хоорондын гэрээгээр 2019 оны 11 дүгээр сарын 05-ны өдрөөс 2023 оны 12 дугаар сарын 31-ний өдөр хүртэл хэрэгжихээр талууд гарын үсэг зурж БНСУ-ын “WOSEM” компани, Кёнгбүкийн Их Сургууль гүйцэтгэгч байгууллагаар шалгаран хэрэгжүүлж байна.

Төслийн нийт төсөвт өртөг 4 сая ам.доллар бөгөөд 1432 м.кв зоорины давхараас гадна 3 давхар барилга, тавилга, эд хогшил, эмнэлгийн үйл ажиллагаанд зориулсан мэс засал, лабораторийн тоног төхөөрөмж бусад багаж хэрэгслүүд бүтээн байгуулалтын зардалд тусгагдсан юм. Мөн Мал эмнэлгийн сургуулийн багш нар, малын эмч нарын ур чадварыг сайжруулах, чадавхыг бэхжүүлэх зорилгоор тухайн төвд хэрэглэгдэх багаж, тоног төхөөрөмжийг хэрхэн ажиллуулах болон Солонгосын мал эмнэлгийн орчин үеийн эмчилгээний арга барил, туршлага олгох сургалтыг БНСУ-ын Кёнгбүкийн Их Сургуультай хамтран хэрэгжүүлж байна.

Багш, малын эмч, суралцагчдын мэргэжлийн ур чадварыг сайжруулах сургалтын хүрээнд МЭС-иас 7 багшийн бүрэлдэхүүнтэй баг 7 хоногоор тус бүр 2 удаа, 15 багшийн бүрэлдэхүүнтэй баг 10 хоногоор 1 удаа БНСУ-д ирж мэргэжлийн ур чадвараа сайжруулсан байна. Мөн БНСУ-ын Кёнгбүкийн их сургуулийн багш, судлаачид Монголд зочилж, багш, оюутан, малын эмч нарт 10 удаагийн сургалт, семинар, 4 удаагийн дадлага олгох сургалтыг зохион байгуулжээ. Үүний зэрэгцээ барилгын гүйцэтгэл, тоног төхөөрөмжийн угсралт, ашиглалт, үйл ажиллагааны менежментийн чиглэлээр мэргэжлийн экспертүүд зөвлөн ажиллаж байна.

ХОЁРДУГААР ШАТНЫ ТӨСЛИЙГ ХОЛБОГДОХ ЯАМД ДЭМЖИЖ БАЙНА

Таван жилийн хугацаатай хэрэгжиж буй энэ төсөл БНСУ-ын Хөдөөгийн Хөгжлийн Корпорацын Олон улстай хамтран хэрэгжүүлдэг төслүүд дундаас цар тахлын хорионоос үл хамааран маш амжилттай хэрэгжсэн төслийн нэгээр шалгарсан. Тиймээс Монголын талаас тавьсан саналын дагуу хоёрдугаар шатны төслийг хэрэгжүүлэх боломжийн талаар Монгол Улсын Засгийн газар, холбогдох яамд, сургуулийн удирдлагын төлөөлөл 2022 оны 11 дүгээр сарын 19-өөс 26-ны өдрүүдэд БНСУ-д албан айлчлал хийж, тус улсын Хөдөөгийн Хөгжлийн Корпорацад уламжилж, харилцан санал солилцлоо. Монголын талаас ХХААХҮЯ-ны Төрийн нарийн бичгийн дарга Т.Жамбалцэрэн, Сайдын Зөвлөх, ХААИС-ийн Удирдах зөвлөлийн дарга Д.Тэрбишдагва, БШУЯ-ны Дээд болон мэргэжлийн боловсролын удирдлага, зохицуулалтын газрын дарга Х.Тамир, Төв аймгийн Засаг Даргын орлогч Г.Сурмаа, ХААИС-ийн захирал О.Баатарцогт, ХААИС-ийн Мал эмнэлгийн сургуулийн захирал А.Гомбожав, Монгол Улсаас БНСУ дахь Консул Б.Оргилдорж нарын төлөөлөгчид БНСУ-ын Хөдөөгийн Хөгжлийн корпорацын удирдлагатай уулзан эхний шатны төслийн үр дүн, дараагийн шатны төслийг хэрэгжүүлэх боломж, Монголын болон Солонгосын талаас хамтран хэрэгжүүлэх ажлын талаар санал солилцлоо. 

Мөн энэхүү албан айлчлалын хүрээнд БНСУ-ын Сөүл дэх Морин тойруулгын төвийн дэргэдэх адууны эмнэлэг, Ичон хотын Жи энд Си адууны эмнэлэг, Мал аж ахуй, газар тариалангийн туршилт, судалгааны төвтэй, дадлага, туршлагад тулгуурласан сургалт явуулдаг Чонан хотын Ёнам их сургууль, Жонжу хотын Газар тариалан, Загасны их сургуульд зочилж, мал, амьтны эмнэлгийн тогтолцоо, судалгаа шинжилгээний үр дүн, онцлогийн талаар танилцлаа.

Ичон хотын Жи энд Си адууны эмнэлэг нь орон нутагт байрладаг хувийн адууны эмнэлэг гэдгээрээ онцлогтой бол Ёнам их сургуулийн хувьд LG группийн санхүүжилттэйгээр үйл ажиллагаагаа явуулдаг бөгөөд ерөнхийдөө тус группийн ирээдүйн чадварлаг хүний нөөцийг бэлтгэхэд чиглэгджээ. Тус улсын томоохон аж ахуй нэгжүүд ирээдүйн хүний нөөцөө хэрхэн бэхжүүлж, бэлтгэж байгааг энэ сургуулийн үйл ажиллагаа, менежментээс харж болохоор байлаа. Мөн Жонжу хотын Газар тариалан, Загасны их сургууль нь 100 хувь Засгийн Газрын санхүүжилтээр үнэ төлбөргүй сургалт явуулдаг төрийн өмчийн сургууль юм. Тухайлбал, тус сургуульд суралцагчдын элсэлтийн бүртгэлээс эхлээд байр, хоол, сургалтын төлбөрийг Засгийн газраас бүрэн санхүүжүүлдэг бөгөөд төгссөний дараа 6 жил ХАА-н салбарт мэргэжлээрээ ажиллах болзолтойгоор гэрээ байгуулдаг байна.

Ийнхүү ХААИС-ийн Мал эмнэлгийн сургуулийн дэргэд байгуулагдаж буй мал эмнэлгийн салбарын хүний нөөцийн чадавхыг бэхжүүлэх, амьтны эмнэлэг барих төсөл амжилттай хэрэгжсэнээр адууны эмнэлэг барих дараагийн шатны төслийн эхлэлийг тавилаа.

Тус төслийн эхний алхам болох газрын асуудал шийдэгдсэн бөгөөд Төв аймгийн Эрдэнэ суманд баригдахаар төлөвлөгдөж байна.