АНУ-ын Миссүригийн их сургуультай хамтран ажиллах гэрээ байгуулав

Хөдөө аж ахуйн их сургууль өнөөдөр АНУ-ын томоохон боловсролын байгууллага болох Миссүригийн их сургуультай сургалт, эрдэм шинжилгээний чиглэлээр хамтран ажиллах гэрээ байгууллаа. Гэрээг Миссүригийн их сургуулийн (МИС) Олон улсын хөтөлбөр хариуцсан захирал Стев Робинет, ХААИС-ийн Гадаад, дотоод хамтын ажиллагаа эрхэлсэн дэд захирал, профессор Х.Алтанцэцэг нар баталгаажуулан гарын үсэг зурсан юм. Тус гэрээнд эрдэм шинжилгээ, соёлын чиглэлээр хамтран ажиллахаас гадна 2+1+1 болон 3+1 бакалаврын зэргийн хөтөлбөрийг хамтран хэрэгжүүлэхээр тусгажээ. Ингэсэнээр ХААИС-ийн оюутнууд 3 жил сургуульдаа суралцаад дараа нь МИС-д 1 жил хүртэл суралцан ХААИС-ийн баклаврын зэрэгтэйгээр төгсөх боломж бүрдсэн байна. Эдгээр оюутнууд МИС-д магистрт суралцах ч боломжтой. Харин тус хөтөлбөрт хамрагдаж буй оюутнуудын англи хэлний мэдлэг, туршлагыг хөтөлбөрт хүлээн авахаас өмнө МИС шийдвэрлэх юм.

Тус сургууль нь 1905 онд байгуулагдсан бөгөөд 185 чиглэлээр бакалаврын, 52 чиглэлээр эрдмийн зэргийн, 5 чиглэлээр докторын хөтөлбөр хэрэгжүүлдэг аж. Одоогоор 85 улсын 1500 гаруй оюутан тус сургуульд суралцан боловсрол эзэмшиж байна.