Монгол улсын хөдөө аж ахуйн их сургууль инженерийн сургууль

Төрөлх сургуулийнхаа хөгжил цэцэглэлт, өнөөгийн байдалтай танилцахаар, Инженерийн сургуулийн тухай мэдээлэл авахаар цаг заваа зарцуулан манай цахим    хуудсанд зочилж буй Танд баярлаж буйгаа илэрхийлэн; профессор багш нар, оюутан залуус, хамт олныхоо өмнөөс болон хувиасаа чин сэтгэлийн халуун дотно мэнд дэвшүүлье. Хөдөө Аж Ахуйн салбарын Үндэсний инженерийн дээд боловсролтой мэргэжилтнийг тус сургууль бэлтгэж эхлээд хагас зууныг ардаа үджээ. Монгол орны хөдөө аж ахуйн салбар төдийгүй Төрийн байгууллага, үйлдвэрлэл бизнесийн бусад салбарын үе үеийн хөгжил дэвшилд манай инженерүүдийн оюун ухаан, техник сэтгэлгээ, зөв менежмент, тэдний бүтээлч үйл ажиллагаа онцгой үүрэг гүйцэтгэж байгааг тэмдэглэхэд таатай байна.

 Улс орон зах зээлийн эдийн засгийн харилцаанд шилжсэн хүнд хэцүү жилүүдэд өөрийн ажил мэргэжилдээ үнэнчээр үлдэж, газар тариалангийн үйлдвэрлэлийн олон жилийн уналт, бууралтын үед ч шантарч төвдөлгүй үйл ажиллагаагаа үргэлжлүүлэн хөгжүүлж, атрын гуравдагаар аяны хүрээнд энэ салбарын үйл ажиллагаа дахин сэргэн мандахад онцгой үүрэг гүйцэтгэж буй аж ахуй нэгжүүдийн захирлын албыг хашиж яваа олон арван инженерүүдээрээ бид бахархаж байдаг юм. Монгол Улсын ХАА-ын үйлдвэрлэл түүний дотор газар тариалангийн салбарыг хойшид авч явах, атрын аяныг амжилттай үргэлжүүлэх, үйлдвэрлэл бизнесийн бусад салбарт ч үр бүтээлтэй ажиллах ирээдүйн 1800 гаруй инженер, залуу мэргэжилтнүүдэд манай сургуулийн хамт олон бид өнөөдөр үйлчилгээ үзүүлж байна. Ерөнхий боловсролын сургуулиа дүүргэн их сургуульд элсэж, инженерийн дээд боловсрол эзэмшихээр төлөвлөж буй охид, хөвгүүд Та бүхнийг тохилог таатай орчинд чадварлаг, туршлагатай багшлах бүрэлдэхүүнээс сургалт, судалгааны ажлын цогц үйлчилгээ авч, өнөө үеийн нийгмийн эрэлт хэрэгцээ, зах зээлийн өндөр шаардлагад нийцсэн мэргэжилтэн болохыг урьж байна. Инженер мэргэжлийн 7 чиглэлээр тус сургуульд өдрийн анги болон, эчнээ, экстарнат хэлбэрээр суралцаж, инженерийн дээд боловсрол эзэмшихийг хүсэж буй хүн бүхний хүсэл зорилго биелэх үүд хаалга тань үргэлж нээлттэй байх болно. Инженерийн сургуулийг төгсөгчид, тус сургуульд ажиллаж байсан, одоо ажиллаж буй профессор багш нар, оюутан залуучууддаа талархал илэрхийлж, web хуудсаар учирч буй бүх хүмүүс Та бүхэнд эрүүл энхийг хүсэж, оюуны шинэ эрч хүч, амжилт бүтээлийн дээдийг ерөөе.