Монгол улсын хөдөө аж ахуйн их сургууль магистр, доктор мэргэшлийн зэргийн сургууль

Хөдөө Аж Ахуйн Их Сургууль бүрэлдэхүүний 8 сургууль, орон нутгийн салбар 1 сургууль, харъяа тэргүүлэх 4 эрдэм шинжилгээний хүрээлэн болон бусад салбар нэгжүүдтэйгээр үйл ажиллагаагаа явуулж, тэдгээрт 1200 гаруй эрдэмтэн, багш, эрдэм шинжилгээний ажилтан ажиллагсад ажиллаж, бакалавр, магистр, докторын шаталсан хөтөлбөрт 10000 гаруй оюутан суралцдаг үндэсний хэмжээний томоохон сургууль юм.       

ХААИС-ийн үйл ажиллагаа нь улс орны тогтвортой хөгжлийг хангах, экологи, хөдөөгийн хөгжлийн чиглэлээр суурь ба хавсрага судалгааг түлхүү хөгжүүлэх, дээд боловсролтой, чадварлаг мэргэжилтэн бэлтгэхэд дотоод гадаад нөөц боломжийг бүрэн ашиглан, хөгжлийн шинэ шатанд гарах зорилтыг хангахад чиглэгдэж байна.

Магистр, докторын сургалтын олон улсын хандлага ЕВРОПЫН СУДАЛГААНЫ ЧАДВАРЛАГ ИХ СУРГУУЛИУД (EUROPEAN RESEARCH - INTENSIVE UNIVERSITIES), АЗИЙН  БОЛОН ЯПОНЫ ЭРДЭМ ШИНЖИЛГЭЭ-СУРГАЛТЫН МАГИСТР ДОКТОРЫН ИХ СУРГУУЛИУД (ASIAN AND JAPANESE GRADUATE UNIVERSITIES) гэсэн хоёр хэлбэрээр хөгжиж байна.

ХААИС нь бакалаврын үндсэн сургалтаас гадна Шинжлэх ухаан, технологийн 40 орчим төсөл гүйцэтгэдэг, АНУ, Канад, Герман, ОХУ, Солонгос, Япон зэрэг 24 орны 120 гаруй сургууль, эрдэм шинжилгээний байгууллагатай хамтын ажиллагааны гэрээтэй ажиллаж, Солонгос, Япон, Оросын Холбооны Улс, Казахстан зэрэг 10-аад орны 40 гаруй оюутан манай сургуульд суралцаж байгаа төдийгүй дээрхи сургуулиудтай магистрант, докторант солилцож, хэд хэдэн хөтөлбөр хэрэгжүүлж байгаа билээ.

Манай их сургуулийн магистрантур, докторантурт суралцсанаар шинжлэх ухааны тодорхой чиглэлээр өндөр чадвар эзэмшихийн зэрэгцээ шинжлэх ухааны төсөл гүйцэтгэх, гаргасан судалгааны үр дүнгээ  хамтын ажиллагаатай их сургуулиудын бүтээлд нийтлүүлэх, олон улсын бага хуралд оролцох эрхтэйгээс гадна орчин үеийн шинжлэх ухааны мэдлэгийг бусад орны их сургуульд үргэлжлүүлэн суралцах замаар олж авах боломж Танд нээгдэж байгаа юм.

Танд эрдмийн цагаан буянаас хишиг их хүртэхийн ерөөл дэвшүүлье.