Монгол улсад тэр дундаа хүнс, хөдөө аж ахуйн салбарт бий болгосон инновацийн шилдэг бүтээлүүдийг олж илрүүлэн, хөрөнгө оруулагч, бизнес эрхлэгчидтэй холбон инновацын бүтээлүүдийг эдийн засгийн эргэлтэд оруулах боломжийг нэмэгдүүлэх зорилгоор Шинжлэх ухааны академи түүний салбар хүрээлэнгүүд, их дээд сургуулиудын эрдэмтэн багш нарын инновацийн бүтээлүүд, хувийн хэвшлийн эрдэм шинжилгээ, судалгааны байгууллагууд, хөрөнгө оруулагчид, бизнесийн байгууллагуудын төлөөллийг оролцуулан хэлэлцүүлгийг зохион байгууллаа. Үүнд: 

• Төр захиргааны байгууллага: 27 /БШУЯ, ХХААХҮЯ, ШУТСан, МТҮП/ 
• Эрдэм, шинжилгээ, их дээд сургууль: 22 /ШУА, ХААИС, ШУТИС, МУИС/ 
• Бизнес эрхлэгч, хөрөнгө оруулагч: 26 /Юнител, Премиум Групп, Грийн Групп, Говь ХК, Таван богд монвет ХХК, Сократус студио/ нийт 75 хүн оролцлоо.

Тус арга хэмжээг нь 3 үндсэн хэсэгтэй зохион байгуулагдсан. 

1-р хэсэг: Нээлт, үндсэн илтгэл 
Нээлтийг Боловсрол, шинжлэх ухааны яамны Төрийн нарийн бичгийн дарга Л.Цэдэвсүрэн нээж үг хэлсэн бол түүний дараагаар Хүнс, хөдөө аж ахуй, хөнгөн үйлдвэрийн яамны Төрийн нарийн бичгийн дарга Т.Жамбалцэрэн үг хэлсэн. 
Мөн дараах үндсэн илтгэлүүд танилцуулагдсан. 

• Цахим хөдөө аж ахуй - Б.Батсайхан, ХХААХҮЯ-ны Мэдээлэл технологи, статистикийн хэлтсийн дарга 
• Хөдөө аж ахуйн салбар дахь ухаалаг технологийн хэрэгцээ, шийдэл - Г.Гантулга, Хөдөө аж ахуйн их сургуулийн Эрдэм шинжилгээ, инновац эрхэлсэн дэд захирал 
• Арьс ширэн түүхий эдийн чанарыг дижитал шийдлээр сайжруулах - Б.Батхүү, Хүнс, хөдөө аж ахуй, хөнгөн үйлдвэрийн судалгаа хөгжлийн төвийн захирал 
• Ойн инновацын парк - Эрдэнэт үйлдвэрийн ногоон хөгжлийн зорилт - У.Уянсанаа, Эрдэнэт үйлдвэр ТӨҮГ, Ногоон хөгжлийн төслийн нэгжийн мэргэжилтэн 

2-р хэсэг: Хэлэлцүүлэг 
ХАА-н салбар дахь хөрөнгө оруулалтыг нэмэгдүүлэх, инновацын бүтээлийг эдийн засгийн эргэлтэд оруулахад тулгарч буй саад бэрхшээл, гарч шийдлийн талаар оролцогч талуудын хийж хэрэгжүүлж буй ажил, цаашдын шийдлийн талаар ярилцсан үр дүнтэй хэлэлцүүлэг болсон. Хэлэлцүүлэгт УИХ-ын гишүүн Ч.Ундрам, ХААИС-ийн Хөдөө аж ахуйн эдийн засаг, инновац хөгжлийн төвийн захирал А.Бакей, Трютлайз ХХК-ийн гүйцэтгэх захирал, хөрөнгө оруулалтын зөвлөх Б.Батжавхлан, Грийн Групп ХХК-ийн Бизнес хөгжлийн албаны дарга Т.Мөнхтулга, Монголын Мэргэшсэн үнэлгээчдийн институтийн мэргэшсэн үнэлгээчин П.Баянсан,  Стартап Маркетинг Спэйс ХХК-ийн гүйцэтгэх захирал Т.Мөнхбаяр нар зочноор оролцлоо.

Оюуны өмчийн эдийн засгийн эргэлтэд оруулах 3 хэлбэр байдаг. Үүнд: 

1.Эрдэмтэн өөрөө гарааны компани байгуулах; 
2.Эрдэмтэн оюуны өмчөө ашиглуулах, түрээслүүлэх; 
3.Эрдэмтэн оюуны өмчөө худалдах.

Эдгээрээс Монгол Улсад 1 дэх хувилбараар 47 компани байгаа боловч 2, 3-р хувилбараар ажилласан тохиолдол тун цөөн байна. Иймд эрдэмтэн хөрөнгө оруулагч, бизнес эрхлэгчдийг холбосон дундын зуучлалын мэргэжлийн байгууллагын үйлчилгээг хөгжүүлэх хэрэгцээтэй байгааг онцолсон. Мөн ХАА-н салбарт хөрөнгө оруулалтыг нэмэгдүүлэхэд НӨАТ-ыг нэвтрүүлэх, чөлөөлөх биш хөнгөлөх тогтолцоог бий болгох, ХАА-н бүтээгдэхүүнд урамшуулал татаас өгөхөөс илүүтэй инновацын хөрөнгө оруулалтыг нэмэгдүүлэх нь зүйтэй гэсэн байр сууринд талууд санал нэгдлээ. 

3-р хэсэг: Инновацын шилдэг төсөл танилцуулах 
Хөрөнгө оруулагч, салбарын бизнес эрхлэгчдэд танилцуулах зорилгоор ХАА-н салбар дахь инновацын төслүүдийг бүртгэж авсан. Нийт 13 төсөл бүртгүүлснээс шилдэг 8 төслийг танилцуулсан. Төслүүдийг хөрөнгө оруулагчид танилцуулахаас өмнө 2 удаагийн чиглүүлэх сургалт орж бэлтгэсэн. Үүнд:

• Хөрөнгө оруулалт гэж юу вэ? Хөрөнгө оруулагчид юу хүсдэг вэ? 
• Хөрөнгө оруулалтын танилцуулга хэрхэн хийдэг вэ? 

Шалгарсан 8 төсөл тус бүр 5 минутын танилцуулга хийсний дараа өөрсдийн төслийн дээжийг бодитоор үзүүлэх, бизнес уулзалтыг ШУТСангийн 301 тоот танхимд зохион байгуулсан. Үр дүнд: 

• 1 төсөл хөрөнгө оруулалтын дараагийн уулзалт хийх сонирхлоо илэрхийлсэн. (Аргалын цаас төсөл - Сократус студио)
• 3 төсөл хамтын ажиллагааны санал солилцсон. (Эко краст - Сүүн зам дейри ХХК, Вет био нэт ХХК, Нэмэлт тэжээл төсөл - Эрдэнэт үйлдвэр ТӨҮГазар, Майкро Ворлд төсөл - Грийн Групаа ХХК)

Зохион байгуулагчид: 

• БШУЯ 
• ХХААХҮЯ 
• Стартап Маркетинг Спэйс ХХК
• ХААИС 

Дэмжигч байгууллагууд: 

• ШУТСан 
• Мэдээлэл Технологийн Үндэсний Парк 
• ХХААҮҮСТөв 
• Дриймерс ТББ 
• Рокит контент

ЭРДЭМ ШИНЖИЛГЭЭ, ИННОВАЦЫН АЛБА