Хэрэглээний шинжлэх ухааны сургуулийн Компьютерын ухааны тэнхимийн бүрэлдэхүүний авхаалж самбаа, хурд хүчээ сорин, найз нөхөрлөлийн харилцааг өргөтгөх зорилгоор жил бүр уламжлал болгон зохиодог спортын тэмцээнийг энэ жил Л.Буянжаргал багштай Программ хангамж хөтөлбөрийн II анги зохион байгууллаа.

Энэхүү спортын арга хэмжээнд тэнхимийн багш нар, Программ хангамж, мэдээллийн систем хөтөлбөрөөр суралцагч оюутан, төгсөгчдийн төлөөлөл нийт 193 тамирчин буюу сагсан бөмбөг төрлөөр 19 багийн 121 тамирчин, волейбол төрлөөр 9 багийн 72 тамирчин хамрагдсан өргөн цар хүрээнд амжилттай болж өндөрлөв. Тэмцээнд спортын дэд мастер 2, нэгдүгээр зэрэгтэй тамирчин 3, мөн 2016, 2022 оны төгсөгчдийн баг оролцсон нь тэмцээнийг илүү сонирхолтой, өрсөлдөөнтэй болголоо.

Хурд хүч, авхаалж самбаагаараа бусдаас онцгойрч Программ хангамжийн IV ангийн оюутан Б.Хадамдарам сагсан бөмбөгийн шилдэг эрэгтэй тоглогч, Программ хангамжийн II ангийн оюутан н.Хулан сагсан бөмбөгийн эмэгтэй шилдэг тоглогч, Программ хангамжийн IV ангийн оюутан Мөнхзаяа волейболын шилдэг тоглогчоор тус тус шалгарч, шилжин явах цомын эзнээр Д.Оргил багштай Программ хангамжийн IV анги шалгарав.

Тэмцээний шагналын эздээр сагсан бөмбөгийн эрэгтэй багуудаас Мэдээллийн системийн ангийн 2016 оны төгсөгчдийн 1-р баг алтан медаль, Программ хангамжийн IV ангийн 1-р баг мөнгөн медаль, – ангийн -р баг хүрэл медаль, сагсан бөмбөгийн эмэгтэй багуудаас Программ хангамжийн III анги алтан медаль, Программ хангамжийн II ангийн 1-р баг мөнгөн медаль, багш нарын баг хүрэл медаль, волейболын төрлөөр Мэдээллийн системийн I анги алтан медаль, Программ хангамжийн II ангийн 1-р баг мөнгөн медаль, программ хангамжийн IV ангийн 1-р баг хүрэл медаль тус тус тодорлоо.