Монгол Улсын ХААИС болон Өвөр Монголын Тариалангийн их сургууль (Inner Mongolia Agricultural university-IMAU)-ийн хамтын ажиллагааны хүрээнд БНХАУ-ын Засгийн газрын тэтгэлгээр 2025–2026 оны хичээлийн жилд магистр болон докторын зэрэгт суралцах оюутныг дараах болзлын дагуу сонгон шалгаруулна.

I. Ерөнхий шаардлага

Иргэншил: Зөвхөн Монгол Улсын иргэн байх.

Эрүүл мэнд ба ёс зүй: Бие бялдар, сэтгэлзүйн хувьд эрүүл, хариуцлага, ёс суртахуунтай, аливаа сөрөг түүх, гэмт хэрэгт холбогдож байгаагүй байх; Хятад улсад зорчих, тэнд оршин суух боломжтой байх.

Боловсрол, насны шалгуур:

• Магистрын хөтөлбөрт: Бакалаврын зэрэгтэй, сурлагын өндөр амжилттай, 35 хүртэлх насны.
• Докторын хөтөлбөрт: Магистрын зэрэгтэй, сурлагын өндөр амжилттай, 40 хүртэлх насны өргөдөл гаргагчийг сонгон шалгаруулна.

Хэлний шаардлага: Хятад хэлний HSK 3 буюу түүнээс дээш түвшинтэй эсвэл тухайн сургалтын хэлний шаардлагад тэнцэхүйц хэлний мэдлэгтэй байх.

Тэтгэлгийн давхардал: Засгийн газрын болон бусад байгууллагын ижил төрлийн тэтгэлэгтэй давхар авсан байж болохгүй. Хэрэв амьжиргааны тэтгэлгийг нуун дарагдуулсан нь илэрвэл ӨМӨЗО-ны тэтгэлгийг хүчингүй болгож, буцаан төлүүлэх арга хэмжээ авна.

II. Бүрдүүлэх материал

Оюутан нь “Магистр, докторын хөтөлбөрт хамрагдах оюутны хавсаргах материалын жагсаалт”-ын дагуу шаардлагатай бүх материалыг бүрдүүлж, цахимаар илгээнэ.

III. Өргөдөл гаргах хугацаа, аргачлал

• Цахим бүртгэл эхлэх огноо: 2025 оны 06 дугаар сарын 01
• Сүүлчийн бүртгэлийн өдөр: 2025 оны 06 дугаар сарын 30

Өргөдөл гаргах вэбсайт: https://isms.imu.edu.cn
Дээрх холбоосоор нэвтэрч, БНХАУ-ын ӨМӨЗО-ны Засгийн газрын тэтгэлгийн системд бүртгүүлнэ.

Үйл явц:

• Элсэх боломжтой мэргэжлийг сонгоно
• Бүрдүүлсэн материалаа цахимаар оруулна
• Материалын хяналт, шалгалтын явц, тэтгэлгийн дүнгийн мэдээллийг системээс хянах боломжтой
• Тэтгэлэгт тэнцсэн тохиолдолд тухайн их сургуулийн урилгын дагуу Хятад улсад ирж, элсэлтээ баталгаажуулна.

 Гадаад харилцаа, түншлэлийн алба